الجنس الآمن للمثليين

|حملة بحبك آمن| شو ممكن بعد نقولك إشي جديد عن الجنس الآ […]

الجنس الآمن للمثليين

HIV_cadfmpaign

|حملة بحبك آمن|


شو ممكن بعد نقولك إشي جديد عن الجنس الآمن والإيدز؟

بالواقع في كتير اشياء. عدد الأشخاص المصابين بالإيدز ومن ضمنهم المثليين عم يعلى، وهادا بيقول إنو على ما يبدو مش الكل بيعرفوا كل اللازم، حقيقة!

طرق الإصابة بفيروس الـ HIV الذي يسبب الإيدز:

عشان تنتقل عدوى الإيدز لازم إنو يتواجدو عنصرين: سائل مُعدي من جهة ونسيج حساس من جهة تانية. سوائل الجسم المعدية والسوائل إللي بيعرف الفيروس إنو يعيش ويتكاثر فيها، محددة، وإحنا منحكي عن: الدم، السائل المنوي (يعني السائل الشفاف المفرز من العضو الذكري إللي بحتوي على الحيوانات المنوية، وحتى الـ Pre Cum) إفرازات المهبل وحليب الأم. أما الأنسجة الحساسة بالجسم، وإللي بتشكل بمثابة “بوابات” لدخول الفيروس للجسم، منحكي هون عن: العينين والأنف، الفم وتجويف الفم، رأس العضو التناسلي الذكري وفتحة البول، المهبل وفتحة الشرج عند الرجل والمرأة  وزيادة عن هيك، إذا كان في جرح كبير ونزيف جديد (متل اللي ممكن يصير لما نقلع سنّ، بس مش نتيجة خرمشة بسة). بالأمكنة الأخرى في الجسم الجلد مبني بشكل إنو ما يسمح لعناصر غريبة من إنها تدخل الجسم، بما في ذلك الفيروس.
هل بينتقل الفيروس باللعاب؟

أخبار منيحة، الجواب هو: لأ. مع إنو الفيروس متواجد بسائل اللعاب، في البول وسائل الدموع ولكنو موجود في تركيز صغير كتير اللي بيأديش للإصابة. وكمان إشي الفيروس مش موجود في سائل العرق.

يعني ممكن الواحد إنو يصاب من قبلة فرنسة مثلاً؟

لا، حتى إذا لسانك عمق لجوا. عشان تشكل هاي القبلة خطر للإصابة لازم يكون الوضع هيك: لازم يكون عندكو التنين جروح كبيرة عم تنزف بشكل فعال ولازم نصل لوضع انو دم يختلط بدم، وحتى اذا وصلنا لهذا الموضع في إمكانية إنو ما يكون في إصابة.

تعالوا نسكر لائحة الـ “لا”:

الفيروس بيعيشش في الهوا ولا على سطح الجلد، وهدا بيعني إنو إذا اجا عبالك تحسمس على جلد إنسان حامل للفيروس أو حتى لحس لجلده مش راح تنعدي. الفيروس بينتقلش باللمس ولا بالعبط أو القبل على أنواعها ودرجات سخونتها. الفيروس بينتقلش عن طريق العطس، وبناءً على إنو الفيروس بيعشش بالهواء هذا بيعني إنو ممكن مشاركة أوعية الأكل والحمام كمان. بس إذا الحمام كان مش هلقد ممكن تنعدي من أمور تانية!

الإيدز بينتقلش عن طريق قرصة الناموس (الهسهس) أو الحشرات التانية ومن ضمنها القمل.

طرق العدوى الرئيسية:

علاقة جنسية مهبلية وشرجية من دون وقاية؛ عن طريق إستعمال إبر ملوثة لتعاطي المخدرات؛ إنتقال العدوى من الأم الحامل للفيروس للجنين خلال فترة الحمل، أو خلال عملية الولادة أو خلال فترة الرضاعة.

إنو “أخلّص برة” يعني جنس آمن؟

شيلي لأ، جنس آمن هو ولوج بس، وبس مع واقي ذكري أي الكوندوم.

كيف بتم العدوى؟

العدوى بتصير بس إذا واحد من السوائل اللي ذكرناهن من جسم إنسان اللي عايش مع الفيروس بينتقل مباشرة لدم إنسان تاني. الإشي بيتم عن طريق جنس غير آمن، أو عن طريق لمس لجرح في الجسم مع واحد من هاي السوائل. مثل باقي الأمراض المنقولة عن طريق الجنس، الخطر للشب السالب هو أكبر من الخطر على الشب الموجب وقت الممارسة الجنسية بين شابين.

ليش لازم أنفحص مرتين؟

في الفحوصات العادية إحنا بالواقع مندّور على أجسام مضادة للفيروس إللي بينتجها جهاز المناعة تبع الإنسان نتيجة التعرض للفيروس. وعشان تبين هاي الأجسام المضادة بيوخدها وقت، حوالي الشهرين، هاي الفترة بتتسمى “فترة الشباك”. وبالتالي، في الفحوصات العادية ممكن إنو نكشف إنو الواحد إنعدى من الفيروس بعد مرور شهرين من يوم الإصابة مش أقل من هيك. عشان هيك مهم إنو نكون آمنين خلال شهرين على الأقل في فترة الشباك. صح، شهرين هني وقت طويل، بس إنو الواحد ينعدي من الأيدز أو يعيش مع المرض إشي مش كتير لزيز. فكر شو كنت إنتي بتختار.

عشان هيك، إذا في شي مرة انا تصرفت بصورة غير مسؤولة إللي ممكن تإذيني وعملت جنس غير آمن، إزا قررت تاني يوم أروح أفحص حالي النتيجة إللي راح أتلقاها مش راح تحكيلي إزا إنعديت إمبارح ولا لأ، هادا الفحص راح يقولي شو كان وضعي قبل شهرين بالنسبة للإيدز، عشان فترة الشباك بعدها ما مرقت عشان أعمل الفحص.. وإزا بدي أعرف إزا إنعديت لازم أستنى إنو الشهرين يمرقو وبعدين أروح للفحص. على شرط إنو بالشهرين هدول معملتش سكس غير آمن.

شو مع الجنس عن طريق الفم (أورال):

واحد من الأسئلة اللي بتنطرح كتير، هوي هل في خطر الإصابة بالإيدز بممارسة الجنس عن طريق الفم؟ الجواب الأنسب لهيك سؤال راح يكون: نعم على ما يبدو، بس الخطر أقل بكثير.

في أبحاث إللي ورجت إنو ممكن تلقي العدوى من الجنس عن طريق الفم، أبحات تانية ورجت إنو الخطورة هي قليلة. وشو العمل؟ هاي هي الحقائق والقرار بين إيديك.

بس عنا أكمن إشي نقلك إياه عن الجنس عن طريق الفم وكيف بتغدر تقلل من خطر الإصابة. الطريقة الأكتر أمان هيي عن طريق إستعمال الكوندوم، وللي بيضايقو من طعمة اللاتكس ممكن يستعملو كوندومات بنكهات مختلفة المتواجدة في الصيدليات. وللي منا إلي إستعمال الكوندوم وقت ممارسة الجنس عن طريق الفم لإلو هو إشي شوي صعب ومش واقعي بننصحك بالتالي: إنو تمارس الجنس الفموي مع استراحات قصيرة بالنص، وهيك بتضمن إنك تحافظ على كمية هوا وسائل لعاب كافي، عشان التنين بيغدرو يحللو الفيروس إذا كانوا متوفرين. والنصيحة إلي بينصحوها جمعيات مكافحة الإيدز هي عدم تنظيف الأسنان مباشرة قبل ممارسة الجنس عن طريق الفم، لأنه بوقت غسل الأسنان بفرشاة الأسنان بمعظم الأحيان ينتج نزيف في النيرة، وحتى إذا ما شفناه لأنه ممكن يكون نزيف خفيف.

يعني شو ممكن الواحد يقول بصورة أكيدة عن الجنس الفموي؟

ممكن نقول إنه الخطر بالإصابة بالفيروس عن طريق الجنس الفموي هو أقل بكثير مقابل الجنس المهبلي إو الشرجي. ومع هيك لازم نضيف إنو في كمان أمراض الي بتنتقل عن طريق الجنس الي ممكن تنتقل بالجنس الفموي.

النسبة هي 0%؟

فش حدا اللي ممكن يمضيلك على هادا الإشي. الفيروس على ما يبدو ممكن إنو ينتقل عن طريق الجنس عن طريق الفم بنسبة قليلة جداً.

ليش؟

صعب كتير إنو نقيس أو نقَدِر حجم الخطورة من الإصابة بالإيدز عن طريق الجنس الفموي من كثير أسباب، السبب الأساسي نتيجة إنو عادةً الأشخاص بيمارسو أكثر من نوع من الفعاليات الجنسية مع بعض. ولما تحدث إصابة، هتلك عاد نعرف من إيش بالزبط إنعدا الواحد. ومع هيك، الدراسات ورجت إنو وجود جروح في الفم، أو قروح على الأعضاء التناسلية، نزيف من النيرة وتواجد أمراض جنسية أخرى بتزيد بشكل كبير من خطر تلقي العدوى عن طريق ممارسة الجنس عن طريق الفم.

وشو مع علاج وقائي من الإصابة بالإيدز؟

الوسيلة الوقائية الأمن هي إستعمال الكوندوم (غير عن عدم ممارسة الجنس بالمرة). بس إزا صارت معاك مشكلة، والكوندوم إنمزع، إو إنك مستعملتش الكوندوم (تسُوء تسُوء مش منيح) أو لاسمح الله تعرضت لعملية إغتصاب، بإمكانك تتوجه لطبيب العيلة حتى يعطيك تحويلة لغرفة الطوارئ بالمستشفى. العلاج إسمو PEP (Post Exposure Prophylaxis).

إستناداً للخبرة المكتسبة في السنوات الأخيرة بهادا الخصوص، الباحثين والأطباء بيعتقدوا إنو كل ما كان أسرعنا بتقديم العلاج الوقائي، راح يكونلو فعالية أكبر. وفعاليتو القصوى محصورة في ال 72 ساعة الأولى من وقت الممارسة الجنسية الغير آمنة.

لازم نشدد إنو مش بكل حالة لممارسة الجنس الغير آمن راح نتلقى العلاج وقائي ضد الإيدز، لأنو العلاج بيشمل عوارض جانبية وخطورة على صحتك. كل ممارسة جنسية بتنقاس بمقياسين: الخطر من الإصابة عن طريق الممارسة الجنسية نفسها، و”مجموعة الخطر” اللي بينتمي إلها شريكك بالجنس. وعلى كل حال، من المحبذ إنو تجيب شريكك بالجنس معاك عشان ينفحص كمان، الإشي مش دايما متاح. كمان سبب عشان نتصرف بشكل مسؤول في أمور مهمة بحياتنا.

شو لازم بعد أعرف عن هادا الموضوع؟

العلاج الوقائي بيمنعش العدوى 100% وفش أبحاث إللي بتورجي إنو هدا العلاج فعال بشكل مطلّق. بل عالعكس، في دراسات إللي ورجت إنو العلاج مش فعال بالمرة. عشان هيك كمان مرة منزكرك إنو ملكاش إلا الكوندوم.

شو هو العلاج الوقائي؟

العلاج الوقائي هو عبارة عن علاج دوائي المكون من عدة أدوية المسماه بالكوكتيل. اللي وضيفتها تعطيل عملية تكاثر فيروس نقص المناعة البشرية. فقط طبيب مختص ممكن إنو يوصف العلاج الوقائي. العلاج بستمر لفترة شهر.

لكوكتيل الأدوية عوارض جانبية مش بسيطة: شعور بالغثيان، وجع بطن، طفح جلدي خفيف، الشعور بالدوخة، وتقلب المزاج. ببعض من الناس اللي بيتلقو العلاج الوقائي ممكن يكون عوارض جانبية حادة أكتر. وعن هاي العوارض لازم نخبر دكتور العيلة.

بأي حالات محبذ إنو نتلقى العلاج الوقائي؟

من المفضل إستشارة الطبيب بهدا الموضوع. إذا كانت نسبة الخطورة هي كبيرة، على سبيل المثال بحالة إنك بتعرف إنو شريكك بالجنس بيحمل الفيروس. بهاي الحالة مفضل تلقي العلاج الوقائي على الرغم من العوارض الجانبية. بمعظم المستشفيات في طبيب مختص بالإيدز إلي ممكن إستشارتو.

طيب، أنا وشريكي منعرف بعض من زمان، إحنا التنين عملنا فحص للإيدز وطلعت النتيجة سلبية (يعني وضعنا صبابا) وفش عنا أمراض جنسية أخرى. وبيناتنا في ثقة متبادلة وفي إطار للعلاقة. إحنا منعمل سكس من دون كوندوم. هل هادا الإشي خطر؟

بهاي الحالة إللي وصفتها فش خطورة عليك. الموضوع هو أكبر من هيك، هو موضوع ثقة ومسؤولية بين شخصين. بيكفي مرة وحدة تزل إجرك أو إجرو سعييتها الجنس الي بيناتكو بيبطل آمن. وإزا بتحسش بأمان، متتنازلش عن الكوندوم. ومحداش يعبيلك راسك إنو أحسن وأحلى من دوم كوندوم، إحنا منحكي هون عن جسمك.

وشو إذا كنت نشيط من الناحية الجنسية ؟

بهاي الحالة مننصحك بإجراء فحوصات دورية كل ستة أشهر على الأقل. إزا كنت نشيط من ناحية الممارسة الجنسية وبتدير بالك إنو ممارستك تكون آمنة بس مرات بيطلعش بإيدك، مننصحك تعمل فحوصات دورية بوتيرة أكتر. ومش الإيدز هو همنا الوحيد. بننصحك إنو تعمل فحص للأمراض الأخرى المنقولة عن طريق الجنس متل: مرض السيلان (جونوريا) الكلاميديا، الزهري (السيفلس) أو الهربس.

كيف بغدر أحصل على تحويلة لإجراء فحص الإيدز؟

تحويلة لإجراء فحص الإيدز ممكن الحصول عليها من قبل طبيب أو طبيبة العيلة. أو بإمكانك التوجه إلى أحد مراكز المفحوصات المنتشرة في أنحاء البلاد الموجودة في المراكز الطبية أو المستشفيات، أو مراكز لجنة محاربة الإيدز أو العيادة المفتوحة في القدس. للمزيد عن مراكز الفحوصات ساعات الدوام والتكلفة يرجى زيارة صفحة مراكز الفحوصات.

متمنى إنو غدرنا نوصلك إشي جديد وحتى إزا كان قليل. منحبك تكون آمن.

لأي سؤال أو إستفسار بإمكانك مراسلتنا على العنوان: b7ebk.2amn@alqaws.org

(ملاحظة: هذه المقالة لا تحل محل الإستشارة الطبية، محتويات المقال تم تقديمها بهدف توفير المعلومات لا غير، وليس بهدف تقديم النصيحة الطبية أيا كانت. فهي لا تشكل بديلاً عن مراجعة طبيبك الخاص أو مراكز الفحص والإستشارة!)


المحرر(ة): علاء حليحل

شارك(ي)

9 تعقيبات

  1. انا وشريكي ما عندنا امراض نقص المناعة
    كيف بتكون العلاقة صحية آمنة
    وللعلم هاد او شريك انا خايف من التعامل الطبيعي وكيف بنحافظ عليها

  2. ممكن المصادر للموضوع دا

  3. التعليقاذا كان شريكي مصاب بالسرطان وع يتلقى العلاج….هل في احتمال انعدى منه….بعدين اللي بيقرا هون بيصل لمرحلة منالخوف يبطل يمارس جنس بالم ة

  4. اريد التواصل بالهاتف للضرورة

  5. الموضوع كتير مفيد …يعطي الكثير من الاجابات على اسئلة مهمة وكثيرة الاستفهام ….
    شكرا لجهودكم …
    وكتر الله من امتالكم
    http://hayatrabi.blogspot.com/
    حياة الربيع

  6. أعزائي, بما إنو السؤال إلي إنسأل هو سؤال كتير بينطرح راح نجاوب عليه هون:
    إزا لاحظت, قدمنالك معادلة في المقالة. هاي المعادلة صحيحة وبتناسب كل السلوكيات والأوضعة الجنسية. وحسبها كل واحد يغدر يعرف إزا السلوك الجنسي كان آمن أو خطر, وإزا خطر قديش نسبة الخطورة. بالنسبة للأورال سكس, هو بالتأكيد أقل خطورة من ممارسات تانية بس بشرط إنو ما يتم إدخال السوائل للتم ولا بلعها ! هادا الإشي مزبوط إزا منحكي عن شبين أو شاب وصبية. وما في داعي يكون في جروح بالتم عشان تصير في عدوى (صحيح إنو الجروح والنزيف يبزيدو من إحتمال الإصابة) فإزا حطينا السلوك الجنسي في المعادلة: من جهة عندي سائل الي ممكن يحمل الفيروس وهو السائل المنوي (وحتى ال pre cum) أو إفرازات المهبل إزا منحكي عن صبية. هادا السائل بيلامس نسيج حساس عند ممارسة الجنس عن طريق الفم, منحكي هون عن الفم والحنجرة. الفيروس ممكن بنتقل من السائل المنوي عن طريق الفم والحتجرة حتى قبل ما يصل للمعدة. عشان هيك نصيحتنا إلك إنو تمارس الجنس الفموي كيف ما نصحنا من قبل مع إستراحات, مع كتير هوا وسائل لعاب. وأكيد مندون سوائل في التم. هادا إزا ما إرتحت تستعمل الكوندوم مع شريكك في الجنس الفموي كمان. بننصحك تفتح الموضوع مع شريكك قبل الممارسة الجنسية, يكون في تفاهم وشعور بالأمان عشان ما يفاجئش الواحد التاني. لمعلومات إضافية بإمكانك تراسلنا وتسأل إلي بدك إباه, وكلشي بسرية تامة.

  7. سؤال مزعج :

    انو بعتقد و ما عم بتفلسف انو بلع السائل المنو و في احتمال انو يكون في جرح بلسانك او الحلق “الزور” او المريء ممكن يوصل لدم قبل ما يوصل للمعده و بعتقد انها خطوره انا مش طبيب بس على حسب المفال بقلك في جرح يعني في خطوره حتى بدون ما يكون في سائل منوي
    و ديروا بالكن من حالكن

  8. لصاحب السؤالل المزعح مرحبا, موضوع الإيدز والوقاية منو هو حقل كبير, أسئلة كتير تطرح حول طرق العدوى أو السلوك الجنسي. عشان هيك فتحنا المجال إنو نتلقى أسئلة وإستفسارات وحتى إقتراحات وملاحظات عن طريق البريد الالكتروني. الأسئلة والإقتراحات ستعالج بسرية تامة وبطريقة مهنية وبرضو gay friendly يا سيدي. راسلنا على: b7ebk.2amn@alqaws.org
    وعلى فكرة, سؤالك مش مزعج بالمرة !

  9. حبيت الموضوع كثير, وحبيت الطريقة الي حكيتو فيها عن الموضوع, بس كنت اتمنى الاقي جواب لسؤال من زمان بدورلو ع جواب.. بالنسبة للجنس الفموي, قريت كثير عنو, وفعلاً مش مثبت إنو ممكن ينقل الفيروس, بس السؤال هو, وسوري إذا الاشي بسبب لإنزعاج البعض, او شعورهن بالقرف.. سؤالي هو هل بلع السائل المنوي ممكن ينقل العدوى ؟ لإنو برضو دورت كثير ع جواب, والي لاقيتو, إنو السائل بتحلل بالمعدة والفيروس بصلش الدم, يعني حتى اذا بلعت سائل منوي لانسان مصاب بالفيروس, مش شرط تنتقل العدوى.. في اثبات ع الموضوع ؟

أرسل(ي) تعقيبًا

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>