الحل هو.. الحل

رضيت منظمة التحرير بالهم والهم ما رضي فيها، ومع هيك إسرائيل بطّلت بدها، شو بتقدروا تعملولها؟

الحل هو.. الحل

7641

"بدناش منكم اشي بس خلونا نحلم"

|علاء أبو دياب|

هو: تاخدي 100 شيكل وتطلعي معي؟

هي: إنت واحد بتستحيش، حقير، شو مفكرني يا قليل الأدب!؟

هو: طيب 500 شيكل؟

هي: إنت واحد بتستحيش، حقير.

هو: 1000 شيكل؟

هي: إنت واحد بتستحيش.

هو: طيب 1500 شيكل؟

هي: يعني من عقلك كل هالجمال بألف وخمسمية بس!؟

هو: ممتاز هيك بدينا نتفاهم، 100 شيكل شو رأيك؟

هيك بالزبط اللي بصير في المفاوضات بين إسرائيل ومنظمة التحرير، منظمة التحرير تنازلت عن المبدأ الأساسي اللي هو عدم الاعتراف بشرعية وجود إسرائيل، الإعتراف ما كان بوجود إسرائيل  مع إنو تم تسويقه بهاي الطريقة وتمريره لإلنا على أساس إنو غير مؤثر، ما همه موجودين شو بدها تفرق إعترفنا أو لأ؟ ما احنا عارفين يا جهبذ إنت وياه انهم موجودين وحاربناهم وحاربونا سنين، شو شايفنا دون كيشوت وبنقاتل طواحين الهوا!؟ بس الإعتراف هون بشرعية وجودها، بحقها التاريخي بالأرض، وهادا الفخ اللي وقعتنا فيه قيادة منظمة التحرير واللي كان أهم هزيمة للثورة الفلسطينية والسبب في الإنحدار اللي إحنا فيه اليوم.

الإعتراف بشرعية وجود إسرائيل رجعنا للـ 100 شيكل، صرنا بلا مبدأ، يبقى زيّنا زي غيرنا، ليش حتى يدفعولنا 1500 شيكل، يعني لو حتى كنّا بنجنن وكَسْماتنا بياخدو العقل هادا بقولش إنو يندفعلنا أكتر من السوق. أصلاً إحنا أسوأ بضاعة ثورية في سوق الشعوب الساعية للتحرر، إحنا الوحيدين –ويكفينا شرف السبق- اللي أعترفنا بشرعية إحتلال أرضنا. مني وعليّ مش موافق على المفاوضات بس حتى لو بدك تفاوض فاوض صح، إحنا بدينا المفاوضات من آخرها، بدينا باللي لازم نختم فيه إذا وصلنا لحل بدينا بالاعتراف، مفكرين حالهم بحضروا فيلم ناجي العلي لما بستشهد ناجي بأول مشهد بعدين ببدا الفيلم!

طبعاً جماعتنا أكلوا المقلب ودخلوا عالبلد وصاروا مسؤولين عنها وصار مفهوم ضمناً إنو الشعب الفلسطيني همّه سكان الضفة وغزة وحق عودة فش، وقصة من البحر للنهر بتنقعها في البحر أو النهر حسب الرغبة وبتشرب ميتها، وفلسطينية الداخل في أحسن أحوالهم بكونوا هنود حمر القرن الحالي، القدس بتكون موضوع نقاش ممتع من باب كسر حاجز الصمت وإستمرارية الحاجة للتفاوض.

“حِلوا السلطة – وتنسوش تاخدوا حماس بطريقكم- وراجعوا المرحلة بكل اخطاءها واعطونا برنامج نضالي حقيقي أهدافه بتليق بنضالاتنا”

يعني رضيت منظمة التحرير بالهم والهم ما رضي فيها، قبلت بحل الدولتين الساقط أخلاقياً وسياسياً وجغرافياً وأمنياً، ساقط بكل الصفوف من اول لثاني عشر، ساقط على روسنا وروس اللي خلفونا ومع هيك إسرائيل بطّلت بدها، حره عاد بدهاش، شو بتقدروا تعملولها؟ كانت بدها تلعب وبطلت، فش بإيدك إشي تعملوا يا فخامة الرئيس أبو مازن ويا سيادة رئيس الوزراء سلام فياض غير تركب الطيارة وتروح تتحزْوَن وتتمسكن باب دار هالرؤساء التانيين، وتشكيلهم ضعفك وقلة حيلتك وطفرك وقلة مدخولك، طبعاً إذا إسرائيل مشكورة رضيت تعطيك تصريح خروج من مناطق يهودا والسامرة..

يوم عالصبح شفت الأخبار وِلا هو أبو مازن بقول تجميد للاستيطان لا يستثني القدس شرط أساسي لاستئناف المفاوضات المباشرة! شو هالشجاعة والصلابة والراديكالية هاي؟ يعني على شوي وفكرت حالي بسمع هوجو شافيز، شوي شوي برضه، مش هيك الأمور بتنحل، شو هالمطلب العنيف هادا؟

شو مفكرنا ولاد زغار كل يوم تحطلنا هدف ونلحقه؟ وإذا تحقق مطلب كل عشر سنين مرة نزقفلك؟ سيدي إحنا شعب ناضل وتعب أكتر من ستين سنة مش عشان يصير موضوعه عالق عند وزارة الأشغال الإسرائيلية وبلدية معاليه أدوميم! تجميد الاستيطان صار شرط للتفاوض؟ من ايمتى هادا سقفنا!؟ إسرائيل بدها إياك تعترف فيها دولة يهودية وانت بدك تجميد الاستيطان؟ الاسرائيلي بطلب وعيك وتاريخك وإنت بتطلب يوقف جرافة؟ على فكره هاي اللعبة صارت بايخة، ومش بس إسرائيل، أنا كمان ما بدي ألعب، وكتير زيي بالمخيمات وبالداخل وبالضفة وغزة وبالقدس ما بدهم يلعبوا، هاي اللعبة صارت مملة ودايماً بنضل نخسر، خليكم إلعبوا لحالكم آخرتها تعتم عليكم الدنيا وتروحوا على بيوتكم.

وبعد 15 سنة من لعبة “انا كل ما اقولّه آه يقولّي هو لأ” –عفكره لازم نحكي مع روبي تسمحلنا نعملها النشيد الوطني للسلطة، كتير لابقة أكتر من فدائي-، هات نحاول نلخص الورطة اللي أحنا فيها، كانتونات محاطة بجدار، خمسة مليون إنسان عايشين عالمساعدات، وأكتر منهم لاجئين على طريق فقدان حقهم بالعودة، تنازل عن اكتر من 70% من الوطن الأصلي، احتلال مجاني مش مكلف أسرائيل اشي، تنازل عن مليون ونص فلسطيني في الداخل، إنقسام داخلي.. الخ.

شو الحل؟ من وجهة نظري، الحل هو الحل.. حل السلطة الوطنية وإجبار اسرائيل على تحمل مسؤوليات احتلالها، خليها تتفضل تأمن أكل وشرب وشغل للملايين اللي احتلتهم، احنا مش مجبورين كشعب إنّا نبيع مواقف وحقوق للدول المانحة عشان رواتب شهر 10، ولا مضطرين نتراجع عن قرار وطني عشان اكم الف تصريح عمل! قبل السلطة كنا ناكل ونشرب وننتفض ونشتغل ونلف فلسطين كلها والأهم من هادا كله كُنّا نحلم، بدناش منكم اشي بس خلونا نحلم، خلولنا مساحة للأمل، اسمحولنا نقول لولادنا إنو في يوم رح تصير تسمع صوت شُفير التاكسي بعسقلان بنادي على آخر راكب على غزة، اتركوها عالقه أحسن ما تحلوها حل ممسوخ، الفقاعة اللي برام الله هاي كلها منتفعين وناس أغنياء كبرت على اكتافنا وسرقت رزقنا وبنت فيه اكم عمارة خلونا نفكر انو الوضع تحسن، بس الناس البسيطة انمسحت، الشعب كله صار مستهلك، بطّل حدا يعرف ينتج، الكل بدور على مؤسسه أجنبية يشرب فيها نسكافيه ويقبض بالدولار آخر الشهر، هادا الفلسطيني اللي بدّك إياه؟ هادا الفلسطيني الفيّاضي اللي بحتفل بشارع التفافي فتحولوا اياه الأمريكان، هادا اللي بدكم نصيره!؟

الغوا اوسلو واعتذروا لفلسطينية الداخل عن الخطيئة اللي ارتكبتها منظمة التحرير بحقهم لما تنازلت عنهم، يمكن ساعتها يسامحوكم، حِلوا السلطة – وتنسوش تاخدوا حماس بطريقكم- وراجعوا المرحلة بكل اخطاءها واعطونا برنامج نضالي حقيقي أهدافه بتليق بنضالاتنا، بدنا دولة ديمقراطية علمانية من البحر للنهر، بدنا حق عودة وبدنا ساحلنا كله، اليهودي ببقى هون ما رح نرمي حدا بالبحر، بس بكون مواطن، حقوقه زي حقوقي وواجباته زي واجباتي، حتى لو هالحل اليوم ببين مستحيل بس هادا هو سبب وجود الثورات، تحقيق المستحيل، وإسأل التاريخ بجاوبك.

من ناحيتي ما رح أزيدها على منظمة التحرير مش لأني ظلمتها او بالغت، بالعكس بس من باب “أذكروا محاسن موتاكم” مش أكتر. نهايته، بدكم تمثلونا، هاي قضيتنا وهيك بس بنرضى تنحل، إذا مش قد هالقصة فاتركوها الله يرضى عليكم، مسامحينكم على اللي عملتوا فينا وعلّي سرقتوا منّا، بس اتركونا بحالنا، وعلى رأي درويش، خذوا حصتكم من دمنا وانصرفوا. وأظن أنكم أخدتوها وزيادة فَـ… الله معكم.

المحرر(ة): علاء حليحل

شارك(ي)

8 تعقيبات

  1. والله يا جماعة الخير الله يمسيكم بانوار النبي . بكينا كاعدين في هلدار تحت ضلها وبين عمدانها . وعمدانها هاي بتحمينا من خفافيش الليل واحنا بنحافظ عليها . وسمعنا خبر اجانا من بعيد كال شو … في ناس بيكولوا انهم من دمنا ولحمنا بدها تيجي من بعيد تحمينا وتحمي دارنا وما اعتبينا الا هلي بيهلوا علينا اشي اصفر واشي احمر واخضر اشكال الوان وكعدوا بينا وفرحنا فيهم وكلنا اجانا الفرج احنا واياهم رح نحمي البيت وعمدانه. واعطيناهم احسن غرف في البيت مش احنا ناس شهمين وكرما وبنحترم الضيف .
    وشوي شوي يا جماعة الخير والحشي للجميع صاروا ينهوا ويؤمروا بينا ، كعدونا على الارض وهم على المراتب (على خازوك)
    والله ويا جماعة الخير ما اعتبينا الا عمدان هلبيت بطلت تتحمل وبلشت تتخلخل . بس مش من الثقل لا لا هي من كثر الضغط عليها لو تدروا ليش…… خفافيش الليل صارت تيجي وتوكف عليها وتوشوش ضيوفنا اللي من دمنا ولحمنا وتكلهم … لشو هاي العمدان ملهاش لزمة خلص كيموها …واحنا والله اصحاب البيت بلاها ولا اشي ..يمكن احنا سهينا شوي وما انتبهنا للشوشة
    بس احنا مش كليلين انتبهنا ووكفنا وصرخنا .. لا لأأ الا عمدان البيت…. ويا ريت بس وكفت على هيش، حاكورة البيت تغيرت الورد فيها بطل ورد واللون لحمر صار سكني…………
    وشو بدي اكول لما اكول يا جماعة الخير

    فقلنا
    يلا روحوا وفكونا منكم وخذوا كل اللي جبتوه معكم. خلونا نرجع زي زمان احنا راضيين بحالنا وهذي الدار دارنا واحنا كاعدين في ضل عمدانها .
    فاذا بهم يصرخون
    هلا هلا
    بعد شو ها
    بعد ما دخل السبت في ……………………كملوها انتوا

  2. اول الكلام كان تمام .. بس بالنهاية انت بدك سلام مع اسرائيل ؟ مواطن حقوقه زي حقوقك واجباتو زي واجباتك ؟
    بالعكس انا لما افكر في بلدنا بالمستقبل بفكر في بلد كلها فلسطينية حقوقنا زي بعض
    مش يهود قتلونا و دبحونا ليش نسينا كل هالاشي
    ليش نسينا مجازر 48 مجازر صبرا و شاتيلا حرب غزة مجازر 67
    و غير الذل الي بنعيشوو سواء بالقدس او الضفة او حتى اراضي 48
    اقسم بربي اشي بقتل من القهر لما تسمع واحد زي عباس نازل يبيع و يتنازل عن الارض انت مين اعطاك الحق اصلا انت صلاحيتك خلصت زمان .. و الي بقهر اكتر احنا الي ساكتين !!! كل واحد هامو اكلو شربو الصبايا الي ماشي معهم و نسبة قليلة بتفكر بفلسطين او سامعة عن استحقاق ايلول ليش ما كلنا ننزل و نكون ايد وحدة و صف واحد كلنا فلسطينية من غير تحيز لاي حزب ليش ما نفرجي اسرائيل انو احنا لسه هون و متزكرين ارضنا

    والله عيب علينا و نازلين نعيب العرب ازا احنا مش قلقانين في بعض
    و زي ما قال مجد
    اذا الشعب حقا اراد الحياة فليملأ الشوارع
    و يارب نشوف حد جد نازل الشارع و معترض و انا اولهم بس الاقي اخوي جنبي بايدي و يشجعني علشان انزل و ادافع عن ارضي

  3. الحل انو ننزل عالشارع… كل فلسطيني ينزل للشارع… بس كيف؟؟؟ ما بعرف.. يمكن الاخر علاء ممكن ينشأ جروب ما بعرف او حدا ينشأموقع… بس مش مثل موقع الانتفاضة الثالثة.. بدنا موقع فلسطيني من فلسطين لحتى نقدر نفهم على بعضنا…

  4. مش جاي ع بالي اليوم أعلق ع التعليقات اللي بترفع الضغط، رح أعلق بس ع مقالك علاء..

    “قبل السلطة كنا ناكل ونشرب وننتفض ونشتغل ونلف فلسطين كلها والأهم من هادا كله كُنّا نحلم، بدناش منكم اشي بس خلونا نحلم، خلولنا مساحة للأمل، اسمحولنا نقول لولادنا إنو في يوم رح تصير تسمع صوت شُفير التاكسي بعسقلان بنادي على آخر راكب على غزة، اتركوها عالقه أحسن ما تحلوها حل ممسوخ، الفقاعة اللي برام الله هاي كلها منتفعين وناس أغنياء كبرت على اكتافنا وسرقت رزقنا وبنت فيه اكم عمارة خلونا نفكر انو الوضع تحسن”

    لما نزلت السنة الماضية ع فلسطين -ولإنو كان إلي كم سنة مش نازلة ولظروف قاهرة- كنت كل ما ألتقي بحدا بعرفو أو تعرفت عليه جديد أسأل نفس السؤال: “كيف شايف الوضع بالبلاد؟” ودايماً أسمع نفس الجواب: “ساق الله إيام الاحتلال!” (بمعنى ما قبل أوسلو/السلطة طبعاً، لإنو الاحتلال ما زال) وأنا نفسي حسيت بهالفرق، لإني زمان كنت سِرّي مِرّي من جنين للناصرة (اللي انولدت فيها ومسجلة بمكان الولادة ع هويتي الخضرا) وهلأ بَح! صار حلم أشوف قرايبي هناك، فش إلا هن ييجوا ع جنين، وهاي موّالها طويل كمان، وطبعاً دخلتي على عكا ويافا والقدس وحيفا وطبريا وغزة وبير السبع والنقب بدهاش حكي، أكيد لأ!

    رام الله اللي زرتها السنة الماضية لأول مرة بحياتي شفت فيها كل شي إلا فلسطين! والفقاعة اللي بتحكي عنها انتبهتلها من أول يوم! برجوازية متخمة متعفنة، ثانكس تو دايتون واللي زرعوه!

    الحكي ما بيخلص، ومشان هيك أحسن شي نجيب من الآخر زي ما عملت إنت؛ الحل هو الحل، واللي مش قد إنو يرجّع فلسطين من راس الناقورة للنقب (على داير حبّة تراب!) يورجينا عرض كتافو.

  5. اه وبالمناسبة هاي الصورة الي انت مستعملها صورتي :))))

  6. عزيزي علاء

    مقالتك كتير بتوجع , بس للاسف هاد هو الواقع , ممكن اتفق معك بنقاط واختلف بنقاط , انا واحدة من الناس الي بفكروا انو حل الدولة العلمانية الديمقراطية الواحدة مع حفظ الحقائق التاريخية والاعتراف بمعاناة الشعب الفلسطيني على مدى قرن او اكثر هو الحل الاقرب الى الحل العادل . بس مين بعرف عنو ؟ مين بفكر فيه ؟ اذا اسرائيل احتلت ارضنا فمنظمة التحرير الفاسدة احتلت عقولنا وحرفت تاريخنا وجهلتنا ووضعت حدود لتفكيرنا ” دولة فلسطينية من جنين الى الخليل ” يا سلام اه صح وسلام اقتصادي, وكأننا شعب جوعان طفران متخلف خاين ومابفهم بالنضال , اكيد عم بتسمع كتير عن تعويضات مادية لضحايا 1 2 3 4 وكـأنو الي هاممنا هو المادة وللأسف الشعب عم بنجر وراهم وبغير مبادء وقيم نضالية . المناهج الفلسطينية بتبدا من أوسلو وكأنو ما كان في شعب وتاريخ ونضال 7000 سنة قبل اوسلو , اخوي الصغير بحكيلي ليس التلفزيزن بحكي اننا تحت احتلال وكتاب التربية الوطنية بحكي اننا عندنا رئيس وسلطة وشرطة وجيش شو احكيلو منهاجك مزيف متل مؤلفه …
    علاء … كلامك رائع بس ايمته بدنا ننتقل من مرحلة وضع السياسات الى مرحلة وضع الاستراتيجيات ؟ يعني بنقدر نضل نحكي ونحكي ونحكي ونحكي وننتفد ونذم ونسب بس بالاخر هن بعملوا الي بدهم اياه وبنرجع نحكي ونحكي ونحكي ونحكي وننتفد ونذم ونسب … انا قررت انو سنة 2011 لازم نكون غير والي صار بتونس اكدلي انها غير بوعزيزي شخص متلي ومتلك اسقط حكم طاغية , مرحلة الاستراتيجيات بتعني خطة عمل مش حكي ؟؟؟ الحكي مهم للتوعية والتثقيف بس اذا ضل حكي وما انتقل لمرحلة التنفيذ بصير حكي فاضي . يعني انا ماشفت في مقالتك افكار عملية , حل السلطة حلو كتير كيف ؟ تثقيف الشعب كيف ؟ لازم نصير نستعمل اسلوب التحريض والتعبئة والتثقيف, بتأمل اننا ننتقل من العالم الافتراضي ونطلع للشارع … الشارع صار مصدي , عاف حالو , بحكيلكو وين ايام الانتفاضة الاولى , وين الاحتجاجات والمظاهرات والاعتصامات اللي اسقطت بن علي.
    ” اذا الشعب حقا اراد الحياة فليملأ الشوارع ”

    مجد عبدالحميد , المقال مش بهالسطحية الي لخصتها بسطرين تعمق اكتر فيه :)))))) وزمان عنك …

  7. يعني عفوا حاسك بتحكي نيابة عن الشعب، مين اللي بدو دولة علمانية … ١٪ ؟؟ بعدين الشعب نفسوا تعبان المشكلة، يعني دايما لازم اتلاقو حد الحق عليه، مستحيل انو الشعب مثلا ايبطل يبني المستوطنات او يشتري منهم لا الحق على فياض طبعا!!
    بعدين انحل السلطة عشان ترجع الناس تعرف اتروح على تل ابيب بسياراتهم، هادا هو الحلم

  8. عزيزي علاء… البالون لا زال بحاجة للهواء،،، البالون لم ينتفخ كما يجب لينفجر… البالون في رام الله، خلق مليون بالون.. المشكلة ليست بالسَلطة وحدها، ايضا الخيار الذي هو جزء من السَلطة بدا يسري به العفن.. والمليون بالون التي في فلسطين ايضا تتسابق من اجل الحصول على اكبر مساحة من الفراغ، ولا تنسى ان الفراغ يعبئ البلد… لان العديد من الشهداء والاسرى والبيوت المدمرة والمبعدين واللاجئين… تركوا المساحات من اجل الفراغ الذي ينتظر البالونات

أرسل(ي) تعقيبًا

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Pin It on Pinterest

Share This