شهداء اللفة/ علاء أبو دياب

ما همنا إنو توجّعنا بس زعلنا عشان راحت علينا الرحلة والتلج اللي قالو بدو ييجي بكرة!

شهداء اللفة/ علاء أبو دياب

|علاء أبو دياب|

بعد الحزن والدموع، بعد أن رأينا مستقبل فلسطين يذبل في حادث سير، لابد من وقفة ومحاسبة!

 ”عمو ليش وديتونا من هديك الطريق؟ وانا فوق شفت طريق أقصر ومليانه ناس وما فيها لفّات!”

الأم في غير بلاد، أسوأ أشي بتتوقعه أنه تروح عالمدرسة يكون إبنها راسب، اما بفلسطين، بتروح تفقد إذا جثة إبنها محروقة ولا مقطعة؟ اذا صابو شلل ولا بس قطعوله إجره، إذا ضل عندها سبب تكمّل حياتها ولا أحسنلها تروح على نفس الشارع وتستنى كمان شاحنة تيجي تدعسها وتطلعها عالسما لتشوف إبنها وتتأكد إنو الملايكة بعملوله الغدا كيف ما كان يحبو في بيتها… تطمّن إذا معطينه حرامات كفاية بهالبرد، تشوف اذا عنده دروس لتاني يوم، بلاش تروح عليه السنة وهو فوق. بالنسبة إلها حتى لو مش محتاج أشي، لازم تطلع، بلكي قدرت تشوف الله وتسأله: ليش يا الله؟! ليش إبني؟

بتعرفو شو، يمكن هاي الكارثة صارت عشان نصحى، عشان نعرف حالنا وين، عشان نتحاسب عالأرض قبل ما نتحاسب في السما.

يمكن السواق كان لازم يتمّهل، يمكن، ما بعرف كيف صار الحادث، بس القيادة الفلسطينية لازم ينحطّلها إشارة “قف” قد وجعنا. قد حلمنا اللي عم بموت بحادث سير عالألتفافي.

 بعرف انو فيها حاجز بس ليش ما تجربوا تقيموه، مش أنتو كبار وقوايا؟

حتى أوضّح شو قصدي للي ما بعرف القدس، هادا الشارع مش هو طريق رام الله- القدس، طريق رام الله – القدس الأصلي بمرق بالشيخ جراح وبعدها بشعفاط وبيت حنينا وقلنديا، كلها مناطق مأهولة وآمنة، ولو الحادث صار فيها كان بالكتير ممكن ولد من الأولاد تنجرح ركبته، بس لأنو إسرائيل مقطعه القدس ومسكّره الشوارع  بالحواجز صارت الناس تروح على شارع إلتفافي خطر بموت فيه أنسان على الأقل كل أسبوع! وشو عملت القيادة؟ جابو دعم وزفتوا الشارع وحطو عليه خطوط بيضا عريضه، مش بس في حزما وجبع، في كل الضفة، فتحو شوارع التفافية حول المستوطنات وإعتبروها إنجاز وطني، وصاروا يروحوا يفتتحوا الشارع ويتصوروا مع الجهة الداعمة! بعرفش مين إفتتح هادا الشارع بالذات، بس مضطر أقولوا شكراً الك ولكل من ساهم معك في إفتتاح مقبرة طريق جبع!

كمان ما بننسى نرسل شكر خاص لكل القيادات والوزارات والخبراء الأجانب والعرب لنجاحهم في تحويلنا من مناضلين غاضبين  لركاب مسالمين على “اللفّة”.

يا أصحاب القرار انتم وكل ما فيكم ملتف! ملتفّين الى الوراء، ملتفّين على حقوقنا، ملتفّين على حدودنا، ملتفين على أحلامنا.. حتى شوارعكم إلتفافية!

بحق شهدائنا الصغار، أعيدوا لنا سلاحنا وحجارتنا لنزيل الحاجز، لا يهمنا كم سنقضى من الوقت ونحن نحاول، ولن نكون الجيل الذي قَبل الالتفاف وإن كان إلتفافاً تكتيكياً!

إذا كنت في القدس فسترى أرواحهم وهي ترفرف في سماء المدينة، سترى الدهشة على وجوههم وهم يرون مدينتهم لأول مرة من الاعلى، جاء أحدهم ألي وأنا أودعهم وقال: “عمو ليش وديتونا من هديك الطريق؟ وانا فوق شفت طريق أقصر ومليانه ناس وما فيها لفّات!”

بعرف انو فيها حاجز بس ليش ما تجربوا تقيموه، مش أنتو كبار وقوايا؟ وعفكرة إحنا ما همنا إنو توجّعنا بس زعلنا عشان راحت علينا الرحلة والتلج اللي قالو بدو ييجي بكرة! عمو بدي اطلب منك طلب، قول للناس اللي في رام الله إنو الطريق اللي بمشّونا اياها  مش طريق القدس.. طريق القدس دُغري وما فيها ولا لفّه..

المحرر(ة): علاء حليحل

شارك(ي)

8 تعقيبات

  1. the most beautiful sentence the other s wasn’t so god… i feel that i agree with u o a lot of issues but somtimes u r too match!! i really think that you should try to keep going wi th these kind of sentences
    by the way you should consider to write with figures … i think you should try to say what you want by figures
    you can be brilliant with it!!
    وعفكرة إحنا ما همنا إنو توجّعنا بس زعلنا عشان راحت علينا الرحلة والتلج اللي قالو بدو ييجي بكرة! عمو بدي اطلب منك طلب، قول للناس اللي في رام الله إنو الطريق اللي بمشّونا اياها مش طريق القدس.. طريق القدس دُغري وما فيها ولا لفّه…

  2. كتبت فأبدعت، و شرحت فاحزنت. الله يصبر أهاليهم.

    بالله عليك شوفلي في كتب التاريخ اكبر امبراطوريه قديش قعدت؟ بدي اعرف اضل ادعي عليهم (بني اسرائيل) ولا اترك مجال لولاد ولادي؟؟؟  

  3. بكيت حتى انتهت الدموع…
    مؤلم جدا ما حصل وصادق وصفك لما حصل.
    شكرا لانك كتبت من اجل الطفولة الضائعة, وقول للناس اللي في رام الله إنو الطريق اللي بمشّونا اياها مش طريق القدس.. طريق القدس دُغري وما فيها ولا لفّه..

  4. كل كلمة حكيتها صح…بس ما هو يا أخ علاء الحق مو بس على القيادة الحق على الشعب االي رضخ للحواجز و للجدار…أنا من القدس و شايفة انحطاط التفكير اللي صار فيها و انو الناس بس همهم التأمين ما ينقطع و بطلوا حتى إروحوا على الضفة عشان الحاجز مقرف و الناس نور مش عشان جندي كلب ما بسوى نازل إذل الناس… و بروح على الضفة برضوا بشوف الناس بس همها تعمل مصاري و تركب جيب و تروح تسهر في المطاعم.. الوضع كله بيئس و اللي بموت برتاح من شوفة هيك عقليات…مش كل الناس هيك بس للأسف الأغلبية…الله يرحمهم

  5. فلسفةٌ بسيطةٌ لكنها عميقةٌ ومؤلمة…
    رقصت حروفك عازفةً فوقَ وتر الحزنِ الكبير…رائع ما خطه قلمك اخي علاء…
    “طريق القدس دغري وما فيها ولا لفة”…أقول ودون مبالغة عبارتك هذه ستدوي إلى الأبد، ولن أتفاجئ ان أصبحت شعارًا نرددهُ حتى نزيل الحواجز فعلًا..
    بوركت ورحم الله شهداءنا طيور الجنة وجعلهم شفعاءَ لذويهم يوم القيامة

  6. كل كلمه نغزه بالقلب..
    حكيك قديش موجع قديش هو دغري وبدون التفافات ..
    علاء دايماً منطقي انت…

  7. وجعتني !

  8. علاء دخيل الله مش ناقصة فلسفة

أرسل(ي) تعقيبًا

لن يتم نشر عنوان بريدك الإلكتروني. الحقول الإلزامية مشار إليها بـ *

يمكنك استخدام أكواد HTML والخصائص التالية: <a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <strike> <strong>

Pin It on Pinterest

Share This